რაისა აბრამია-მიქაძე დაიბადა 1908 წელს, ქალაქ ბათუმში.

სწავლობდა თბილისის სამხატვრო აკადემიაში იაკობ ნიკოლაძესთან. იყო ერთ-ერთი პირველი ქართველი მოქანდაკე ქალი. სტუდენტობის წლებიდანვე მონაწილეობდა გამოფენებში. ნამუშევრები: „მიჯაჭვული ამირანი“, „ლადო კეცხოველის პორტრეტი“. 30-იან წლებში შექმნა მსახიობების თამარ ჭავჭავაძის, ვერიკო ანჯაფარიძის ბიუსტები და სხვა.

არცერთი ნამუშევარი არ შემორჩენილა.

დიდი საბჭოთა ტერორის დროს, მეუღლის - არჩილ მიქაძის დაპატიმრების კვალდაკვალ, 1937 წლის 20 ოქტომბერს რაისა აბრამია-მიქაძე საქართველოს სსრ შინსახკომმა დააპატიმრა, როგორც - "ხალხის მტრის" ოჯახის წევრი.

1938 წლის 7 იანვარს, საქართველოს სსრ შინსახკომის განსაკუთრებულმა სათათბირომ რაისა აბრამია-მიქაძეს 8 წლით პატიმრობა მიუსაჯა "შრომა-გასწორების კოლონიაში".

გადასახლებული იყო შორეულ აღმოსავლეთში, ბანაკში - პოტმაში.

პატიმრობიდან გაათავისუფლეს ვადაზე ადრე, 1944 წლის 20 მაისს.

1940-იან წლებში, საქართველოში დაბრუნების შემდეგ ქანდაკებისთვის აღარ მიუმართავს.

რეაბილიტირებულია 1955 წლის 29 ოქტომბერს, საქართველს სსრ უმაღლესი სასამართლოს მიერ.

მუშაობდა კინოსტუდია „ქართულ ფილმში“ რედაქტორად.